- قصيدة زجلية
- مرسال
- مرسال من النسر لشمعة
- وصل الرقاص وقال لا لة نور القلوب
- جاتك برية من المحبوب
- فيها شلة كلام مكتوب
- يقول حبيبتي
- رسلت حروف معطرة بريحتي
- لكن جيت نرسم ليك صورتي
- لقيت قلبي راسم صورتك نتي
- الشوق سم ولفراق جراح عميقة دواهم نتي
- الجو يصفا والطيور تغني فوجودك نتي
- حبيبتي ..... شمعتي
- كترفع علامات الفرح وتتسرج الحروف
- ولقوافي بارود
- يلا حضرتي نتي
- لالة الغزالة لالة الغزالة أنا المملوك
- والمالكاني نتي
- دموعي نشفات
- من بعد الحزان ماكترات
- وسبابها نتي
- صقصي الرقاص يلا كلامي كدبتي
- بالله عليك يالمالكة سواكني
- وسوارت فرحي وحزاني
- رحميني ولا تركيني نعاني
- هدي برية مرسولة ليك نتي
- ومعاها صورتي
- يوسف هي سميتي
- ندكرك يلا نسيتي
- شمعتي
- قلبي مجروح ودايب فهوك غي نتي
- يا الشمعة يلامت سبابي نتي
- داك النهار لا تبكي
- وصية لا تزوري قبري
- حيت المقتول تطعن بيديك نتي
- هدي برية مكتوبة بخط يدي
- مدادها دم بدموعي مسقي
- مرسولة ليك غير نتي
- شمعتي ... حبيبتي
- يوسف جنات (محكاك)
الخميس، 8 يونيو 2017
مرسال /// بقلم الشاعر يوسف جنات (محكاك)
الاشتراك في:
تعليقات الرسالة (Atom)
ليست هناك تعليقات:
إرسال تعليق