- زجل لطيف عن عملية خلع ضرس العقل ............ تجربة شخصية حقيقية
- .....................................................................
- ضرس العقل
- .................
- حاحكيلو حكاية عن ضرسى
- اللي قارفنى ومزهقنى
- وليلاتى حارمنى النوم
- قلت اروح للدكتور
- يمكن يقدر ينجدنى
- م اللى قارفنى وعذبنى
- خلانى ابات مهموم
- قاللى تشيلة مالوش لازمة
- وان جيت وحشيته اعمل ازمة
- قلت اتوكل ع اللى خالقنى
- ده كل ليلة يوماتى فى أزمة
- عنها وخدت 3 حقنات
- بنج من الأحمر بالذات
- وبالكماشة يلخلع فيه
- ولا يتحرك ولا يتعتع
- كأنه واحد مات اتاريه...
- قاللى ده لازم تدخل عمليات
- قلتله يالا اتوكل ع اللى حماك
- ودخلت اوضة العمليات
- عده كتيرة لقيتها قصادى
- واكتر من دكتور بينادى
- قالوا ياسيستر هاتى البنج اياه
- خدت 3 حقنات تانيين
- قاللى حااعمل شق صغير
- بالمشرط عشان اوسع ليه
- واقدر امسك بالكماشه التاج
- قلت اتفضل شوف بقى شغلك
- ساعة ونص بكل تمام
- كان مخلوع الضرس فى ايدة
- جابه وفرجهولى وايده
- غرقانة فى الدم !!
- قاللى ده كان مكسور نصين
- نص قدرت اطلعهولك
- والنص التانى مغروس ف الفك
- فى الاخر وأخدت ....... غرزتين
- كان يا جماعة يوم ما حصلش
- عدا عليا كأنه شهور
- اصل ده كان " ضرس العقل "
- اللى حارمنى النوم لشهور
- صعبان عليا انى فقدته
- وخفت افقد عقلى معاه
- والحمد لله رب كريم
- ما خلعتهوش على ايد نجار
- كان زمانه ضرب دقماق
- وبالمكده قشطهولى
- وهى دى حكايتى مع ضرسى
- ضرس العقل اللى قارفنى
- واهو اتشال بالعقل كمان ...
- وعجبى .....
- ........................................
- أيمن الحداد
الأحد، 14 يناير 2018
ضرس العقل // بقلم أيمن الحداد
الاشتراك في:
تعليقات الرسالة (Atom)
ليست هناك تعليقات:
إرسال تعليق