شهادتى مجروحه
------
1-
مطوحى فيا
أنا جامد ذى الجبال
وان كنتى فاكرانى عيل
دانا ابو الرجال
هاتى اخرك معايا
هتشوفى منى أهوال
حتى لو بالنار
بتكوينى
2-
إضربينى
إجلدينى
ولا بعد مليون جلده
هتبكينى
3-
دوسى عليا بجزمتك
وأدام كل الناس
عنفينى
4-
كسرى فيا
وفى أشهر ميدان
قلعينى هدومى
وأربطينى
5-
بردوا مش هطاطى
انا انسان
وليا كيان
مش زرع شيطانى
على جسور الغيطان
ما بيأسشى
صدقينى
6-
مزوده العيار شويه
وايه يعنى
هى جات ع المره دى
مانتى بقالك سنين بتحاولى
تموتينى
7-
حطتينى فى الكفن
بدل المره مرات
سوتينى على نار هاديه
بدل الشويه شويات
وأدينى اهوه
لسه عايش
ومستسلمتش
ولا هتزمينى
8-
بقالك كام سنه مخصمانى
وفى كل حاجه معندانى
ولا مره واحده
خطر على بالك
تكلمينى
9-
ولا عمرك زرتينى
فى العيد
ولا همك انا لابس قديم
ولا جديد
بتنهد لوحدى
وعمرى ما تعبت م التنهيد
وحزين
عمرك
ما هتشوفينى
10-
اجرى ورايا بأخر جهدك
كل طريق بمشيه
سديه
كل امل ببنيه
هديه
كل نور بشوفه بعينيا
عنى داريه
وايه الجديد فى كدا
مانتى طول عمرك
بتكرهينى
11-
مزهقتيش من اللف ورايا
فى كل مكان
وفى كل شق
حطالى تعبان
مبقاش يهمنى قرصهم
وإتعود جسمى على سمهم
عايش مسموم
ومامتش
بتهدى فيا
مبتهدش
وبردوا مش عايزه
تسيبينى
12-
هسيب النهايه
بينى وبينك مفتوحه
مانا لو ذكيت نفسى
شهادتى مجروحه
بس مش انا
اللى هرمى المنديل
ولا انتى هترميه
لسه بينا المشوار طويل
ويمكن اللى مخصماه من سنين
بكره تحبيه
ولو محبتنيش
ميهمنيش
ولو قدرتى عليا فى يوم
ابقى
قابلينى
----
----
شهادتى مجروحه
حسن محمد على
ليست هناك تعليقات:
إرسال تعليق