همسات (3)
__________________
صلوا على المصطفى
في اليوم عشر مرات
تلقوا الشيطان اختفى
والحزن والخلافات
والقلب يبقى عمار
والعين تشوف أزهار
والخير يعم الدار
ويزيد مع البركات
صلوا على المصطفى
في اليوم عشر مرات
تلقوا الشيطان اختفى
والحزن والخلافات
___________________
زمن الرجال انتهى
وبقت عيال ف عيال
وانا ياما ناس شفتها
ف الجدعنة موال
الكلمة زي السيف
والأصل عالي شريف
والدم برضه خفيف
مهما تشوف أهوال
زمن الرجال انتهى
وبقت عيال ف عيال
وانا ياما ناس شفتها
ف الجدعنة موال
____________________
لو يوم زرعتوا الحب
مش محتاجين متاريس
ياللي حكمتوا الشعب
بالغش والتدليس
بحر الفساد مجنون
ولكل دين بيخون
شايف عروسة الكون
مش لاقيه فينا عريس
لو يوم زرعتوا الحب
مش محتاجين متاريس
ياللي حكمتوا الشعب
بالغش والتدليس
______________________
على باب مدينة العجب
مكتوب بخط كبير
ممنوع دخول الأدب
والصدق ف التعبير
اضحك ف وش الناس
واغدر بكل حماس
لو يوم تكون حساس
هتعيش غريب و فقير
على باب مدينة العجب
مكتوب بخط كبير
ممنوع دخول الأدب
والصدق ف التعبير
______________________
شعر / محمد الشرقاوي
ليست هناك تعليقات:
إرسال تعليق